ಎನ್ನ ಪುಸ್ತಕ

ದೇವರು ಕೊಟ್ಟ ಖಾಲಿ ಹಾಳೆಯ ಪುಸ್ತಕ ಎನ್ನ ಜೀವನ,
ಪುಟಗಳನ್ನು ತೆಗೆದೋದಲು ಹಂಬಲಿಸಿದೆ ಮನ,
ನೂರು ಪುಟದ ಪುಸ್ತಕವೆಂಬರು ಜನ,
ತಿಳಿದವರ್ಯಾರು ! ಕಡೆಯ ಪುಟದೊರೆಗೂ ಗೌನ,
ಮೊದಲಾರು ಪುಟಗಳು ಎನಗರ್ಥವಾಗದ ಲಿಪಿ,
ಹಿರಿಯರು ಓದಿ ತಿಳಿಸಲಾಗುವ ಅವರು ಬರೆದ ಲಿಪಿ,
ಏಳನೇ ಪುಟದಲಿ ಮಿಂಚಿ ಮಾಯವಾಗುವ ಒಂದೆರಡು ಅಕ್ಷರ,
ಎಂಟರ ದಂಟು ಮೆಲಕು ಹಾಕುವ ಎಂಟನೇ ಪುಟ,
ಒಂಬತ್ತರಿಂದ ಹನ್ನೆರಡನೇ ಪುಟ, ಆಟ ಪಾಠ ಕಥೆಗಳದ್ದೇ ಕಾರು ಬಾರು,
ಆಕಾಶಕ್ಕೆ ಏಣಿ ಹಾಕುವ ಹದಿ ಹರೆಯ ಪುಟಗಳು,
ಕನಸಿನ ಬೆನ್ನೇರುವ ಇಪ್ಪತ್ತು-ಇಪ್ಪತೈದರ ಪುಟ,
ಹೊಸ ಅತಿಥಿಯ ಎದುರು ನೋಡುವ ಮೂವತ್ತರೊರಗಿನ ಪುಟ,
ಆಯ ವ್ಯಯಗಳೇ ತುಂಬಿ ಹೋಗುವ ಮುಂದಾರು ಪುಟ,
ಮುಂದೇನು ಎಂಬುದ ಹುಡುಕಾಟದಲಿ ಜೋತಿಷ್ಯದ ಮೊರೆ,
ಖಾಲಿ ಹಾಳೆಯ ಪುಸ್ತಕ ಬರಿ ನೆಪ ಮಾತ್ರವೇ?
ದೇವರು ಬರೆದಿಟ್ಟ ಹಣೆಬರಹದ ಕನ್ನಡಿಯೋ ಎಂತೋ!! 

ಹುಡುಕಾಟ

ಇಂದು ನಾ ಬರೆವುದು ನಾಳೆಗಾಗಿ,
ಒಬ್ಬರಾದರೂ ಓದುವರೆಂಬ ಆಸೆಯಿಂದಾಗಿ,
ಓದಿ ಎನ್ನ ಮೆಚ್ಚಿ ಹೊಗಳುವರೆಂದಲ್ಲ,
ಇಂದಲ್ಲ ನಾಳೆ ಎನ್ನರಿವ ಮನದ ಹುಡುಕಾಟದಲಿ.

ಎನಗಿಲ್ಲ ಸ್ನೇಹಿತರ ಕೊರತೆ,
ಸಾವಿರ ಮಂದಿ ಸ್ನೇಹಿತರೆನಗೆ,
ಬರಿ ಅಂಕಿ ಅಂಶಕೆ ಭೂಷಣ,
ಮೌನ ಮೂಡಿದೆ, ಬಾರವಾಗಿದೆ ಮನ.

ಕೇಳುವ ಕಿವಿಗೆ ವಿಜೃಂಬಿಸದ ಮಾತು ಎನ್ನದು,
ಮಾತನಾಡುವ ಮೂಕ ನಾನು - ಕೇಳುವ ಕಿವುಡರಿಗೆ,
ಹಗುರಾಗಬೇಕಿದೆ ಮನ, ಕಂಡುಕೊಂಡಿದೆ ಬರೆವ ಹಾದಿ,
ಇಂದಲ್ಲ ನಾಳೆ ಎನ್ನರಿವ ಮನದ ಹುಡುಕಾಟದಲಿ.