ಗ್ರಂಥಾ + ಆಲಯ

ಇತ್ತೀಚಿನ ದಿನಗಳಲ್ಲಿ ಗ್ರಂಥಾಲಯಕ್ಕೆ ಹೋಗುವ ಹವ್ಯಾಸ ಬೆಳೆಸಿಕೊಳ್ಳುತ್ತಿದ್ದೇನೆ.  ಓದುವ ಕಾಲದಲ್ಲಿ ಓದಲಿಲ್ಲವಾದರೂ, ಓದಲು ಕಾಲಮಿತಿ ಇಲ್ಲವೆಂದು ಅರಿವು ಅದ್ಯಾವ ಬೋಧಿ ವೃಕ್ಷದ ಅಡಿಯಲ್ಲಿ ಇದ್ದಾಗ ಆಯಿತೋ ನಾ ಅರಿಯೆ.  ನಾನು, ನನ್ನ ಸ್ವಂತ ಹೆಂಡತಿಯೊಂದಿಗೆ ಗ್ರಂಥಾಲಯಕ್ಕೆ ವಾರಕ್ಕೊಮ್ಮೆ ಭೇಟಿ ನೀಡುತ್ತಿದ್ದೇನೆ.  ಆಕೆಗೆ ಓದಲು ಬಹಳ ಇಷ್ಟ. ನನಗು ಇಷ್ಟ, ಆದರೆ ಓದಲು ಕಷ್ಟ, ಏಕೆಂದರೇ.... ಓದುವ ಕಾಲದಲ್ಲಿ........ "Yes"... ಓದಲಿಲ್ಲ.   ನಾನು 10 ಪುಟ ಓದುವ ಸಮಯದಲ್ಲಿ ನನ್ನಾಕೆ 100 ಪುಟದ ಪುಸ್ತಕ ಓದಿ ಮುಗಿಸಿರುತ್ತಾಳೆ.  ನಾನು ಗ್ರಂಥಾಲಯಕ್ಕೆ ಹೋದಕೂಡಲೆ ನನ್ನ ಮನಸ್ಸು ಸೂರೆ ಮಾಡುವುದು ಅಲ್ಲಿನ ಪುಸ್ತಕಗಳ ಸುವಾಸನೆ.  ಅದರ ಅನುಭವ ನೀವು ಗ್ರಂಥಾಲಯಕ್ಕೆ ಹೋಗಿಯೇ ಆಸ್ವಾದಿಸಬೇಕು. ಯಾವುದೇ ಹೋಟೆಲ್ ಗೆ ಹೋದರು ಮಸಾಲೆ ದೋಸೆ ಹೇಗೆ ಘಮ ಘಮಿಸುತ್ತದೋ, ಅದೇ ರೀತಿ, ಎಲ್ಲಾ ಗ್ರಂಥಾಲಯದ ವಾಸನೆಯು ಒಂದೆ.  ನಾನು ಗೌರೀಬಿದನೂರಿನಲ್ಲಿ ಇದ್ದಾಗ ಗ್ರಂಥಾಲಯ ಒಂದು ದ್ವೀಪದಂತೆ ಮಾರುಕಟ್ಟೆ ಮದ್ಯೆ ಇತ್ತು.  ಆದಾಗ್ಯೂ, ಗ್ರಂಥಾಲಯದ ಸುವಾಸನೆ ಪಸರಿಸುತ್ತಿದ್ದದ್ದು ಸೋಜಿಗ.

"ಸಗಣಿ ಜೊತೆಗಿನ ಸರಸಕ್ಕಿಂತ, ಗಂಧದ ಜೊತೆಗಿನ ಗುದ್ದಾಟವೇ ಲೇಸು" ಎಂಬಂತೆ - ಮಾರಕ ಟಿ.ವಿ, ಮೊಬೈಲು, ಇಂಟರ್ನೆಟ್ ಇತ್ಯಾದಿಗಳ ಸರಸಕ್ಕಿಂತ, ಗ್ರಂಥಾಲಯದ ಒಡನಾಟ, ಅಲ್ಲಿ ಬರುವ ಜ್ಞಾನ ದಾಹಿ ಭಕ್ತರ ನೋಡಿ - ಹೂವಿನ ಜೊತೆ ನಾರು ಸ್ವರ್ಗ ಸೇರಿದಂತೆ, ನನ್ನನ್ನು ಯಾವುದಾದರು ಧಡ ಸೇರಿಸುವುದೋ ಎಂಬ ಆಶಾಭಾವನೆ.  ಇಂದಿನ ಈ ತಂತ್ರಜ್ಞಾನ ನಮ್ಮ ಮಾನವ ಸಂಕುಲವ ಎಲ್ಲಿಗೆ ಕರೆದೊಯ್ಯುವುದೋ ಕಾಣೆ!  ಬೇಕಿದ್ದೋ, ಬೇಡವಾದ್ದೋ ತುರುಕುವ ಸಾಮಾಜಿಕ "ಜಾಲ" ತಾಣಗಳು.  ಬೆರಳಂಚಿನಲ್ಲಿ ದೊರಕುವ ಮಾಹಿತಿ ನಮ್ಮ ಮೆದುಳನ್ನು ನಿದ್ರಿಸಲು ಬಿಟ್ಟು ತಮ್ಮ ಕಾರ್ಯ ಸಾಧನೆಗೆ ಸುಖದ ಸೋಪಾನವೇರಿದೆ.   AI, Artificial Intelligence ಕಾಲ ಇದು. ಹೆಚ್ಚು ಬುದ್ಧಿ ಇರುವ ಮನುಷ್ಯರು ಸೇರಿ, ಮನುಷ್ಯರ ಬುದ್ದಿ ನಿಷ್ಕ್ರಿಯಗೊಳಿಸಿ, ಒಂದು ಯಂತ್ರ ಆ ಕಾರ್ಯಗಳನ್ನು ಮಾಡುವ ವಿಧಾನ.  ಇದು ಹೀಗೆ ಮುಂದುವರೆದರೆ Darwin Theory ಪ್ರಕಾರ ಮುಂದೆ ಹುಟ್ಟುವ ಯಾವ ಮಕ್ಕಳಿಗೂ ಬುದ್ಧಿಯೇ ಇಲ್ಲವಾದಂತೆ ಹುಟ್ಟುವುದೇ? ಪ್ರಪಂಚದಲ್ಲಿ 84 ಲಕ್ಷ ಜೀವ ರಾಶಿಗಳಿವೆಯಂತೆ. 83,99,999 ಜೀವಿಗಳಿಗೆ ಇಲ್ಲವಾದ ಬುದ್ಧಿ ಕ್ಷಮತೆಯನ್ನು ಆ ದೇವರು ಮಾನವ ಜೀವಿಗೆ ಕೊಟ್ಟ ವರ ಇಂದು ಶಾಪವಾಗುತ್ತಿದೆಯೇ?  ಇಂಥ ಗೊಂದಲದ ನಡುವೆ ಮುಂದಿನ ಪೀಳಿಗೆಗೆ ಅಳಿಲು ಸೇವೆ ಸಲ್ಲಿಸಲು ಗ್ರಂಥಾಲಯಕ್ಕೆ ಮೊರೆ ಹೋಗುತ್ತಿರುವೆ.  ಏಕೆಂದರೆ, ನಮ್ಮ ಚಿಣ್ಣರು ನಮ್ಮ ಮಾತು ಕೇಳುವುದಕ್ಕಿಂತ ನಾವು ಮಾಡುವುದನ್ನು ಅನುಸರಿಸುವುದೇ ಹೆಚ್ಚು.

ಗ್ರಂಥಾಲಯದ ಒಳಗೆ ಪ್ರವೇಶಿಸಿದಂತೆ ಸಾವಿರಾರು ಪುಸ್ತಕಗಳ ನಡುವೆ ಯಾವುದನ್ನ ಓದುವುದು ಎಂಬ ಯಕ್ಷ ಪ್ರಶ್ನೆ. ಏಕೆಂದರೆ, ಗುರು, ಗುರಿ ಎರಡು ಇಲ್ಲದ ಹಾದಿಯಾಗಿದೆ. ಕೈಗೆ ಸಿಕ್ಕ ಪುಸ್ತಕವ ತಂದು ಓದಲಾರಂಭಿಸಿದೆ.  "ಆನೋ ಭಧ್ರ ಕರ್ತಾವೋ ಯಂತು ವಿಶ್ವತಃ" ಋಗ್ವೇದದ ಈ ವಾಕ್ಯದಂತೆ ಒಳ್ಳೆಯ ವಿಚಾರ ಎಲ್ಲಾ ದಿಕ್ಕಿನಿಂದಲೂ ಪಸರಿಸಲಿ - "Let the noble thought come from all directions".  ಮೊದಲು ಓದುವ ಹವ್ಯಾಸ ಮೂಡಿಸಿಕೊಳ್ಳುವ ತೆರದಲಿ.  ಆ ಪುಸ್ತಕದ ವಾಸನೆಯ ಜಾಡು ಹಿಡಿಯುತ... ಆ ಜ್ಞಾನದ ವಾಸನೆಯ ಪಡೆಯಲಿಚ್ಚಿಸುತ... 

ಹೋಗುವ ಬನ್ನಿ ಗ್ರಂಥಾಲಯಕೆ... ಜ್ಞಾನ ದೇವಾಲಯಕೆ... 

ಬಡವನಾದರೆ ಏನು ಪ್ರಿಯೆ...

ಇಂದು ಬೆಳಗಿನಿಂದ ಈ ಹಾಡು ಮನದಲ್ಲೇ ಗುನುಗುನಿಸುತ್ತಿದ್ದೆ - "ಬಡವನಾದರೆ ಏನು ಪ್ರಿಯೆ... ಕೈ ತುತ್ತು ತಿನಿಸುವೆ...".   ಸತ್ಯಾನಂದ ಪಾತ್ರೋಟ ಅವರ ರಚನೆ, ಸಿ. ಅಶ್ವತ್ ಅವರ ರಾಗ ಸಂಯೋಜನೆ, ರಾಜು ಅನಂತ ಸ್ವಾಮಿ ಅವರ ಜೇನ್ ಕಂಠದ ಗಾಯನ.  ಈ ಹಾಡು ಅದೆಷ್ಟರ ಮಟ್ಟಿಗೆ ಕಾಡಿತು ಎಂದರೆ, ಊಟಕ್ಕೆ ಮುನ್ನ ಒಮ್ಮೆ ಕೇಳಿದೆ, ತಣಿಯದ ಮನ ಮತ್ತೆ ಸಂಜೆಯೂ ಕೇಳಿದೆ.  ವೈದ್ಯರು ಹೇಳುತ್ತಾರಲ್ಲ... ಮಾತ್ರೆಯನ್ನು ಊಟಕ್ಕೆ ಮುನ್ನ, ಊಟ ಆದಮೇಲೆ, ಸಂಜೆಗೆ ಒಂದು... ಅದೇ ರೀತಿ, ಮಾತ್ರೆ ತೊಗೊಂಡಂತೆ ಹಲವು ಬಾರಿ ಈ ಹಾಡು ಕೇಳಿದೆ, ಅದೆಷ್ಟೋ ಬಾರಿ ಗುನುಗುನಿಸಿದೆ.  ಈ ಹಾಡಿನ ಸಾಹಿತ್ಯಕ್ಕೆ ಆ ರಾಗ, ಆ ರಾಗಕ್ಕೆ ಆ ಭಾವತುಂಬಿದ ಗಾಯನ, ಎಲ್ಲವೂ ಹೇಳಿ ಮಾಡಿಸಿದಂತಿತ್ತು.

ಎಲ್ಲರೂ ಅವರವರ ಹಂಡತಿಯನ್ನು (ಹೆಂಡತಿಯರನ್ನು ಎಂದರೆ ತಪ್ಪಾಗಬಹುದು) ಪ್ರೀತಿಸಿತ್ತಾರೆ.  ಅಂತೆಯೇ, ನಾನು ನನ್ನ ಹೆಂಡತಿಯನ್ನು (ಹೆಂಡತಿಯನ್ನೂ ಅಲ್ಲ) ಪ್ರೀತಿಸುವೆ.  ಆದರೆ ಈ ಹಾಡು ಕೇಳಿದಮೇಲೆ ಒಂದು ಪಟ್ಟು ಪ್ರೀತಿ ಹೆಚ್ಚಾಯಿತೋಯೇನೋ  ಎಂದು ತಿಳಿಯದಾದರೂ, ಪ್ರೀತಿಗೆ ಹಣದ ಹಂಗಿಲ್ಲವೆಂಬುದು ಈ ಹಾಡು ಅರ್ಥ ಮಾಡಿಸುತ್ತದೆ. ಪ್ರೀತಿಯಲ್ಲಿ ಒಬ್ಬ ಶ್ರೀಮಂತ ತನ್ನ ಹೆಂಡತಿಗೆ ಕೊಡಿಸುವ ಚಿನ್ನ, ವಜ್ರ, ವೈಡೂರ್ಯಕ್ಕೋ ಅಥವ ಒಬ್ಬ ಬಡವ ತಾನೇ ಮಾಡಿ ಬಡಿಸುವ ಅಡಿಗೆಗೋ ಯಾವ ವೆತ್ಯಾಸವಿಲ್ಲ. ಏಕೆಂದರೆ ಇಲ್ಲಿ ವಸ್ತುಗಿಂತ ಅಪ್ಯಾಯಮಾನ ತನ್ನ ಗಂಡನು ಹೆಂಡತಿಗೆ ಕೊಡುವ ಪ್ರಾಮುಖ್ಯತೆ ಮತ್ತು ಸಮಯ, ಅದರಲ್ಲಿ ಆಕೆಗೆ ಸಿಗುವ ಸಂತೃಪ್ತಿ.  ಶ್ರೀಮಂತನ ಆ ಚಿನ್ನದ ಉಡುಗೊರೆ ಹಾಗು ಬಡವನ ಈ ಕೈತುತ್ತು ಹೆಂಡತಿಗೆ ಸಿಗುವ ಸಂತೃಪ್ತಿ ಒಂದೇ ಆದಲ್ಲಿ... ಶ್ರೀಮಂತ ಶ್ರೀಮಂತನಲ್ಲ, ಬಡವ ಬಡವನಲ್ಲ.  ಉದಾಹರಣೆಗೆ, ಒಬ್ಬನ ಬಳಿ ೧೦೦೦/- ರೂ ಇದ್ದು, ಇನ್ನೊಬ್ಬನ ಬಳಿ ೧೦/- ರೂ ಇದ್ದಾಗ, ೧೦೦೦/- ರೂ ಉಳ್ಳವನು ೧೦/- ರೂ ದಾನ ಮಾಡಿದರೆ, ೧೦/- ರೂ ಇದ್ದವನು ೧/- ರೂ ದಾನ ಮಾಡಿದರೆ, ಇಬ್ಬರು ಸಮಾನರಲ್ಲವೇ. ಎಲ್ಲೋ ಕೇಳಿದ ನೆನಪು, ಭೂತಾನ್ ದೇಶದಲ್ಲಿ ಜಿ.ಡಿ.ಪಿ. ಅಳೆಯಲು ಆ ದೇಶದ ಪ್ರಜೆಗಳ ಸಂತೋಷ - ಸಂತೃಪ್ತಿಯೇ ಮಾಪನವಾಗಿವೆಯಂತೆ (ಪರಿಶೀಲಿಸಬೇಕು).   ನಮ್ಮ ದೇಶದಲ್ಲಿ ಸಂತೋಷ - ಸಂತೃಪ್ತಿಯ ಮಾತಿರಲಿ, ಬರಿ intolerance (ಅಸಹಿಷ್ಣುತೆ) ಬಗ್ಗೆ ಲೋಕಸಭೆ ಮೊದಲಗೆ, ಇಡೀ ದೇಶ ಅದರ ಬಗ್ಗೆ ಚರ್ಚಿಸುತ್ತ ಒಂದು ವರ್ಷ ಕಳೆದೇಬಿಟ್ಟೆವು.  ಆಹಾ!!! ನೋಡಿ, ಹೆಂಡತಿ ಎಂಬ ಪದದ ಪ್ರಭಾವ... ವಿಷಯ ಎಲ್ಲಿಂದ ಎಲ್ಲಿಗೋ ಹೋಯಿತು.

ಪ್ರೀತಿ ಎಂದರೆ ಯಾವುದಾದರು ಉಡುಗೊರೆ ಕೊಟ್ಟರೆ ಮಾತ್ರವೇ ಪ್ರೀತಿಯೇ?  ವಾರಕ್ಕೊಂದು outing, ತಿಂಗಳಿಗೊಮ್ಮೆ ಏನೋ ಒಂದು gift, birthday gift, Anniversary gift... ಇಷ್ಟಿದ್ದರೆ ಮಾತ್ರವೇ ಪ್ರೀತಿಯೇ? ಹಾಗಾದರೆ, ಪ್ರೀತಿ ಎಂಬೋದು ಒಂದನ್ನು ಕೊಟ್ಟು ಇನ್ನೊಂದನ್ನು ಪಡೆಯುವ ವ್ಯಾಪಾರವಾಗುವುದಿಲ್ಲವೇ?

• ಹೆಂಡತಿ ಗಂಡನ ತಲೆಗೆ ಎಣ್ಣೆ ಒತ್ತಿ, ನೀರು ಹಾಕುವಾಗ ಸಿಗುವ ಪರಸ್ಪರ ಪ್ರೀತಿ.  (ಈ ಕಾಲದಲ್ಲಿ ತಲೆಗೆ ಎಣ್ಣೆ ಹೋಗಿ ಗಂಡ ಹೆಂಡತಿ ಹೊಟ್ಟೆಗೆ ಎಣ್ಣಿ ಹಾಕುತ್ತಾ ಕೂರುತ್ತಾರೆ... ಆ ಪ್ರೀತಿಯ ಅರಿವು ನನಗಿಲ್ಲ) 
• ಗಂಡ ಅಥವ ಹೆಂಡತಿ ಊಟಕ್ಕೆ ಒಬ್ಬರಿಗೊಬ್ಬರು ಕಾದು ಒಟ್ಟಿಗೆ ಊಟ ಮಾಡುವಾಗ ಸಿಗುವ ಪರಸ್ಪರ ಪ್ರೀತಿ. 
• ಗಂಡ ಕಚೇರಿ ಮುಗಿಸಿ ಮನೆಗೆ ಬರುವುದನ್ನು ಕಾದು ಕದ ತೆಗೆಯುವಾಗ ಕಾಣುವ ಪ್ರೀತಿ. 
• ಹೆಂಡತಿಗಾಗಿ ಆಗೊಮ್ಮೆ, ಈಗೊಮ್ಮೆ ಕಸ ಮುಸುರೆ ಮಾಡುವ ಗಂಡನ ಪ್ರೀತಿ, ಅದರಿಂದ ಹೆಂಡತಿಗೆ ಸಿಗುವ ತೃಪ್ತಿ. 
• ಒಟ್ಟಿಗೆ ತಿಂಗಳ ಮನೆ ಸಾಮಾನು, ತರಕಾರಿ ತರುವಾಗ ಸಿಗುವ ತೃಪ್ತಿ 

ಹೀಗೆ, ಹೇಳುತ್ತಾ ಹೋದರೆ ದೊಡ್ಡ ಪಟ್ಟಿಯೇ ಸಿಗುತ್ತದೆ. ಅಂತೆಯೇ ಸಂತೋಷದ ಪಟ್ಟಿಯೂ ಇಮ್ಮುಡಿಯಾಗಬಹುದು.  ಇದರಲ್ಲಿ ಸಿಗುವ ಪ್ರೀತಿಯ ಸಂತೃಪ್ತಿ ಯಾವುದೊ ಐಷಾರಾಮಿ ಉಡುಗೊರೆ ಕೊಟ್ಟಾಗ ಆ ವಸ್ತು ಹಾಗು ತೃಪ್ತಿ ಒಂದು ಭದ್ರ ಕಪಾಟಿನಲ್ಲೋ, ಕ್ಯಾಮರಾದ ಒಳಗೋ, ಸೇರಿ ಮಲಗಿರುತ್ತದೆ.

"ಉಳ್ಳವರು ಶಿವಾಲಯವ ಕಟ್ಟಿಸುವವರು, ನಾನೇನು ಮಾಡಲಿ ಬಡವ ಕಣಯ್ಯಾ.." ಎಂಬ ವಚನ ಸಾಹಿತ್ಯದಂತೆ, ಉಳ್ಳವರು ನಾ ನಾ ಬಗೆಯ ಉಡುಗೊರೆ ಕೊಟ್ಟು ಪ್ರೀತಿಯ ವ್ಯಕ್ತಪಡಿಸಿದರೆ, ಒಬ್ಬ ಬಡವ ತನ್ನ ಹೆಂಡತಿಗೆ ನಾನೇನು ಕಮ್ಮಿ ಇಲ್ಲ ಎಂದು ತನ್ನ ತನು, ಮನ, ಧನವೆಲ್ಲ ಧಾರೆ ಎರೆದು ಕೈತುತ್ತು ತಿನಿಸುವೆ ಎಂದು ಹೇಳುವ ಈ ಸಾಹಿತ್ಯ ಹೃದಯ ಸ್ಪರ್ಶಿ, ಸಂಗೀತ ಹಾಗು ಗಾಯನ ಜೀವಾಳ.  ನಾನು ಈಗ ಮತ್ತೊಮ್ಮೆ ಆ ಹಾಡನ್ನು ಕೇಳಲು ಹೊರಟೆ... ನೀವು ಕೇಳಿದ್ದೀರಾ?

ನಿಮ್ಮವ,
ಫಣಿ 

ಕರುನಾಡ ಕರ್ಣ

ಕರುನಾಡ ಕರ್ಣ

ಕನ್ನಡಿಗರು ನಾವು ಕರ್ಣನಂತೆ ಎನ್ನಬಹುದೇ ,
ಎಂದೋಡೆ, ಕರುನಾಡಿಗೆ ಕನ್ನಡವೇ ಕರ್ಣ ಕುಂಡಲ ಅಲ್ಲವೇ,
ಕರ್ಣನ ಹುಟ್ಟು ಕ್ಷಾತ್ರವಿರಬಹುದು, ಅಪರಿಚಿತನಾಗಿ ಬೆಳಿಯಲಿಲ್ಲವೇ!
ಶ್ರೀಮಂತ ನಮ್ಮ ಕನ್ನಡ, ಜಗಕೆ ಅಪರಿಚಿತವಾಗಿ ಉಳಿದಿಲ್ಲವೇ!
ಆ ಕರ್ಣ, ದುಂಬಿಯ ಕೊರೆತಕೆ ನೋವು ಉಣಲಿಲ್ಲವೇ,
ಕನ್ನಡಿಗರು ನಾವು, ಪರ ಭಾಷೆಯ ಧಾಳಿಗೆ ಮರುಗುತಿಲ್ಲವೇ,
ಕರ್ಣನ ಧೀರ ಶೌರ್ಯಕೆ ಎಲ್ಲೆಲ್ಲೂ ಮನ್ನಣೆ,
ಅಂತೆಯೇ ಕನ್ನಡ ಸಾಹಿತ್ಯಕೆ ಹಲವು ಜ್ಞಾನ ಪೀಠ,
ಯುದ್ಧದಲ್ಲಿ ಕಲಿತ ವಿದ್ಯೆ ಮರೆಯುವ ಶಾಪ ಕರ್ಣಗೆ,
ಈ ಯುಗದಲ್ಲಿ ಯಾರ ಶಾಪ ಕನ್ನಡ ಮರಿಯುತ್ತಿರುವ ಕನ್ನಡಿಗರಿಗೆ!
ಅವಸಾನವಾದ ಕರ್ಣ ತನ್ನ ಎದೆಯಾಳದ ಕುಂಡಲವ ಬಗೆಯುತಲಿ,
ಕರುನಾಡು ಕಾಣದಿರಲಿ ಇಂಥ ಧುರಂತ, ಕನ್ನಡಾಭಿಮಾನದ ಅಮೃತ ಕವಚ ಕಳಚದಿರಲಿ...
 

ಗೊಂದಲ

ಗೊಂದಲ

ನಿಂತ ಬರವಣಿಗೆ ನನ್ನದು,
ಗೊಂದಲಕೆ ಸಿಲುಕಿಹ ಭಾವನೆಗಳಲ್ಲಿ.

ಗೊಂದಲದ ಗೂಡು ಈ ಜಗತ್ತು,
ಎದೆಯಾಳದಲಿ ಕುರುಕ್ಷೇತ್ರ,
ಮನ ಅಶ್ವ ಎತ್ತೆತ್ತಲೋ ಸಾಗಲು,
ಹಲವು ಕೃಷ್ಣ ಸಾರಥಿ ದೊರಕಾರು...
ಹೇಳದ್ದು ಮಾಡದವರು!!!
ತೊರೆ ತೊರೆ ಎಂದದ್ದೇ ಹಿಡಿವ ಹುಚ್ಚರು,
ಆ ಹುಚ್ಚರೇ ಜಗದ ಅಚ್ಚು ಮೆಚ್ಚಿನವರು,
ಮನ ಒಲಿಸಲು ಮಾಡುವ ಕಸರತ್ತು,
ಮುಖವಾಡವ ಬದಲಿಸುವ ಪ್ರತಿ ಹೊತ್ತು,
ಕಾಮ ಕ್ರೋದ ಲೋಭಗಳ ಕುಣಿತ,
ಸಾತ್ವಿಕತೆ ಮುದುಡಿ ಮಲಗಿದೆ ಮಣಿಯುತ,
ನೆನ್ನೆಯ ಸರಿಯೇ ಇಂದಿನ ತಪ್ಪು,
ಇಂದಿನ ತಪ್ಪು, ನಾಳೆಯಾ ಸರಿ...

ಗೊಂದಲಕೆ ಸಿಲುಕಿಹೆ ಮನ,
ಬರವಣಿಗೆ ನಿಲ್ಲಿಸಲೇ ನಾ!!!
 

ಗಾಣದ ಎತ್ತು

ಕಾಲ ಚಕ್ರವೆಂಬ ಗಾಲಿಗೆ ಸಿಲುಕಿಹ ಗಾಣದ ಎತ್ತು ನಾ,
ಕಾಲದೊಂದಿಗೆ ತಿರುಗಿ ತಿರುಗಿ ಬಳಲಿ ಬೆಂಡಾಗಿಹೆ ನಾ,
ಬಾಲ್ಯವೆಂಬ ಮುಂಜಾನೆಯ ಹುರುಪು,
ಬಿರು ಬಿಸಿಲ ಮಧ್ಯಾಹ್ನಕೆ ಸೋತು ಸೊರಗಿದೆ,
ಸಂಧ್ಯಾ ಕಾಲದ ತಂಪಿಗೆ ಕಣ್ ಪಶ್ಚಿಮ ನೋಡುತಿದೆ,
ಇಹ ಲೋಕದ ಸೂತ್ರಧಾರ ಬಿಡುಗಡೆಗೈದಲ್ಲಿ,
ಭಾವ ಲೋಕದ ಕೊಟ್ಟಿಗೆಗೆ ಓಡುವ ತವಕ,
ಶಾಶ್ವತವಲ್ಲ ಈ ಕೊಟ್ಟಿಗೆ, ಮಾಡಿ ಮಿಕ್ಕ ಕರ್ಮವಿದೆ,
ಮತ್ತೊಂದು ಹೊಸ ದಿನ, ಹೊಸ ಹುರುಪು, ಕರ್ಮದ ಪಯಣ

ಪೆದ್ದು ಫಣಿ 10 (corporate)

HR says "Shiva ratri no holiday.  Because the ritual is of night there is no need of holiday in day time.  If some one in night shift, need not be in holiday as he has to be wake up whole night".

ಪೆದ್ದು ಫಣಿ 9 (ಹೊಸ ನೋಟು)

ವೆಂಕ : ಏನಪ್ಪಾ ಪಿ.ಪಿ, 100 ರೂಪಯ್ ಕೊಡಕ್ಕೆ 2000 ರೂಪಯ್ ನೋಟ್ ಕೊಡ್ತಿದ್ಯಲ್ಲ... Original ತಾನೇ... ತೊಗೋಬಹುದೇ...

ಪಿ.ಪಿ : ಅರಾಂಸೆ ತೊಗೋ ವೆಂಕ, doubtಟೇ ಬೇಡ, ನಾನೇ ಖುದ್ದಾಗಿ print ಮಾಡ್ಕೊಂಡ್ ಬಂದಿದೀನಿ

ಪೆದ್ದು ಫಣಿ 8 (beware of dog)

ವೆಂಕ: ಲೋ ಪಿ ಪಿ, ಈ ನಡುವೆ ದಾರಿ ಉದ್ದಕ್ಕೂ, ಬೀದ್ ಬೀದಿಲು, ಯಾರ್ ಯಾರದ್ದೋ photo ಹಾಕ್ಕೊಂಡಿರ್ತಾರೆ, ಏನ್ ಸಮಾಚಾರ ಆದ್ರದ್ದು...

ಪಿ ಪಿ: ಮನೆ ಮುಂದೆ "beware of dog" ಅಂತ board ಹಾಕಿರ್ತಾರೆ ಗೊತ್ತಾ, ಅದೇ ತರ ಇವರು ಆಯಾ area ಗೆ ಮೀಸಲು. ಹುಷಾರು ತಂಟೆಗೆ ಹೋದ್ರೆ ಕಚ್ಬಿಡ್ತಾರೆ

ಪೆದ್ದು ಫಣಿ 7 (ಇಷ್ಟ)

ನಾವ್ ಇಷ್ಟಪಡೋವ್ರು ನಮ್ಮನ ಇಷ್ಟ ಪಡಲ್ಲ, ನಮ್ಮನ ಇಷ್ಟ ಪಡೋವ್ರನ್ನ ನಾವ್ ಇಷ್ಟ ಪಡಲ್ಲ

ಪೆದ್ದು ಫಣಿ 6 (ನೆಡಿಯೋ ಕಾಲು)

ನೆಡಿಯೋ ಕಾಲು ಎಡುವೊದು ಸಹಜ ಅಂತೆ,
ಹಾಗಂತ, ದುಡಿಯೋ ಕೈ ಕುಡಿಯೋದು ಸಹಜ ಆಗಬಾರದು ಆಲ್ಲವೇ??

ಪೆದ್ದು ಫಣಿ 5 (ಪೆಟ್ಟು)

ಮೊನ್ನೆ ಒಂದ್ಸಲ ಬಸ್ಸ್ ನಲ್ಲಿ ಹೋಗ್ತಿರಬೇಕಾದ್ರೆ ಯಾರೋ ಒಬ್ಬ ಸುಂದರ ಯುವತಿ ನನ್ನ ಮೇಲೆ ಬಿದ್ದ್ಬಿಟ್ಟರು, ಪಾಪ ಸೌಜನ್ಯಕ್ಕೆ ಪೆಟ್ಟಾಯ್ತಾ ಅಂತ ಕೇಳಿದ್ರು.  ನಾನು "ಏನೋ ಗೊತ್ತಾಗಲಿಲ್ಲ ಇನ್ನೊಂದ್ಸಲ ಬಿದ್ದನೋಡಿ, ಹೇಳ್ತೀನಿ" ಅಂದೆ, ಅದಕ್ಕೆ ಕಪಾಳಮೋಕ್ಷ ಮಾಡೋದೇ.... ಆಗ ತುಂಬಾ ಪೆಟ್ಟಾಯ್ತು... 

ಪೆದ್ದು ಫಣಿ 4 (ಮಾಯೆ)

Facebook ಮಾಯೆ ಎಂಬರು,
Facebook ಮಾಯೆಯಲ್ಲ,
Whatsapp ಮಾಯೆ ಎಂಬರು,
Whatsapp ಮಾಯೆಯಲ್ಲ,
Twitter ಮಾಯೆ ಎಂಬರು,
Twitter ಮಾಯೆಯಲ್ಲ,
ಅಲ್ಲಿ ಬರುವ likes, comments, shareಗಳೇ ಮಾಯೆ ಕಾಣ ಮಿತ್ರೇಶ್ವರ

ಪೆದ್ದು ಫಣಿ 3 (cash less)

ವೆಂಕ : ಲೋ ಫಣಿ, ATM ನಲ್ಲಿ cashಯೇ ಸಿಗ್ತಿಲ್ಲ ಕಣೋ
ಪಿ ಪಿ : ಹೌದೆ!!!
ವೆಂಕ : ಜೀವನ ಕಷ್ಟ ಆಗ್ಬಿಟ್ಟಿದೆ ಕಣೋ...
ಪಿ ಪಿ : ಅಯ್ಯೋ ಪಾಪ..
ವೆಂಕ : ನೀನ್ ಎನ್ ಮಾಡ್ಕೊಂಡಿದ್ದಿಯ ಇದಕ್ಕೆ ವ್ಯವಸ್ಥೆ
ಪಿ ಪಿ: ನೋಡ್ ವೆಂಕ, ಹೆಂಡತಿ ಗಂಡಂಗೆ ಬೈಯ್ಯೊದು ಯಾರ್ ಹತ್ರಾನು ಹೇಳ್ಕೊಬಾರ್ದು,  ಹಾಗೆ, ಈಗ ಇರೋ ವ್ಯವಸ್ಥೆ ಎಷ್ಟೇ ಕಷ್ಟ ಆದ್ರು ಹೇಳ್ಕೊಬಾರ್ದು

ಪೆದ್ದು ಫಣಿ 2 (Traffic)

ನಡುರಾತ್ರಿ, ಸುಮಾರು 11:30 ರ ಸಮಯ, ಯಾರು ಇಲ್ಲದ ನಗರದ ಖಾಲಿ ರಸ್ತೆ,

ಕಾರಿನಲ್ಲಿ ಬರುತ್ತಿದ್ದ ನಮ್ಮ ಪಿಪಿ, ತಟ್ ಎಂದು ನಿಲ್ಲಿಸಿದ ಕಾರನ್ನು,

ನೊಡಿದರೆ Red Signal ಬಿದ್ದಿತ್ತು,

ತಾನೆ ಮಹಾ ನಿಷ್ಟಾವಂತನಂತೆ ಬೀಗಿದ,

ಮೂರು ದಿನದ ತರುವಾಯ ಮನೆಗೆ NOTICE ಬಂತು,

Traffic Violation: Stopping at Pedestrian Crossing or Crossing Stop Line

ರಚನೆ: ಫಣಿ

ಪೆದ್ದು ಫಣಿ 1 (ಜಪ)

ಅಪ್ಪ: ಲೋ ಫಣಿ, ಏನೋ ಮಾಡ್ತಾ ಇದ್ಯಾ
ಪಿ ಪಿ: ಜಪಾ ಮಾಡ್ತಾ ಇದ್ದೀನಿ ಅಪ್ಪ
ಅಪ್ಪ : ಜಪ ಮಣಿ ಎಲ್ಲೋ
ಪಿ ಪಿ: ಜಪ ಮಣಿ ಯಾಕಪ್ಪಾ, Tv remote control ಕೈನಲ್ಲೇ ಇದ್ಯಲ್ಲ, button ಒತ್ತಿದಾಗೆಲ್ಲ 'ರಾಮ ರಾಮ' ಅಂದರೆ ಸಾಕು, ಗಂಟೆಗೆ ಸಹಸ್ತ್ರ ನಮಾವಳಿ ಆಗುತ್ತೆ